Shoqatat e dala nga lufta e UÇK-së protestojnë të enjten: Nga 99 pjesëmarrës në çdo komunë

Shoqatat e dala nga lufta e UÇK-së protestojnë të enjten: Nga 99 pjesëmarrës në çdo komunë

Organizatat e dala nga lufta e UÇK-së dhe Shoqata e ish- të Burgosurve Politikë, kanë paralajmëruar protest për të enjten, pavarësisht thirrjeve që ajo të mos mbahet për shkak të rrezikut nga pandemia.

Nasim Haradinaj nga kjo organizatë, ka thënë në konferencë për media se protesta do të mbahet në gjithë vendin me nga 99 pjesëmarrës për çdo komunë, "në shenjë të vitit 1999, kur Serbia mori goditjen përfundimtare në Kosovë".

"Ne i jemi drejtuar IKSHPK-së për mendim profesional. Ne sot kemi marrë përgjigje dhe na kanë thënë se nuk preferojnë veprime të tilla sepse rrezikojmë shëndetin e popullatës. Prandaj, ne nuk duam që të marrin përgjegjësi qoftë edhe për një individ, andaj në protesta do t’i delegojmë kryetarët e degëve që të organizojnë në ditën e njëjtë, në orën e njëjtë, me nga 99 persona. Protesta ndërron taktikë, qasje, ku nuk rrezikohen qytetarët. Pra, degët e shoqatave, dhe degët e veteranëve marrin autorizimin për të organizuar protestën. Ne do ta mbajmë në Prishtinë me 99 persona", ka thënë Haradinaj.

Haradinaj tha se me këtë protestë po i drejtohen bashkësisë ndërkombëtare, pas propozim-aktakuzës ndaj presidentit Hashim Thaçi dhe kryetarit të PDK-së Kadri Veseli për kinse krime lufte, e të cilat këta dy të fundit i kanë hedhur poshtë si të pavërteta.

"Ne po i drejtohemi edhe drejtësisë ndërkombëtare, që tregoi se është politike. Nuk po ndjek individët. Kjo është vetëm protesta e parë, por tani për tani është ky hap ", tha ai.

Kryetari i OVL UCK-së Hysni Gucati, tha se në gusht do t'i drejtohen Kuvendit që të mos i vazhdohet mandati Gjykatës Speciale.

"Ne do t'i drejtohemi Parlamentit që të mos i vazhdohet mandati kësaj gjykate ", tha ai, duke shtuar se me të gjitha grupet parlamentare do të diskutojnë dhe beson se do të gjejnë mirëkuptim në kërkesat e tyre.